ရန်ကုန်တိုင်းဒေသကြီး၊ လှည်းကူးမြို့နယ်၊ ကျောက်ကုဒင်ကျေးရွာအုပ်စု၊ ကဒစ်ကျေးရွာ၊ လှည်းကူး-ဖောင်ကြီးလမ်းမပေါ် မော်တော်ယာဉ် တစ်စီး မီးလောင်မှု

     ၂၀၂၅ ခုနှစ်၊ မတ် ၂ ရက် နံနက် ၅ နာရီ ၅၅ မိနစ်ခန့်က ရန်ကုန်တိုင်းဒေသကြီး၊ လှည်းကူးမြို့နယ်၊ ကျောက်ကုဒင်ကျေးရွာအုပ်စု၊ ကဒစ်ကျေးရွာ၊ လှည်းကူး-ဖောင်ကြီးလမ်းမပေါ်တွင် လှိုင်သာယာမြို့နယ် (FMI City)မှ တောင်ငူမြို့သို့ ယာဉ်မောင်း ဦးဝင်းကျော်မြင့် မောင်းနှင်လာသော ယာဉ်အမှတ် BGO-11/5N-XXXX TOYOTA TOYOACE အမျိုးအစား ခဲရောင် ခြောက်ဘီး Box Truck မော်တော်ယာဉ်သည် ကားနောက်ခန်းအတွင်း Inverter အသုံးပြုသည့် Battery 50Ah(12)V နှစ်လုံး၏မိန်းခဲငုတ်ပေါ်သို့ Micro Wave မီးဖိုတွင် အစားအစာများကင်ရာ၌ အသုံးပြုသည့် အကင်စတီး/သံပြား ပြုတ်ကျရာမှ Battery ရှော့ဖြစ်၍ မီးပွားထွက်ပြီး မီးစတင်လောင်ကျွမ်းမှုဖြစ်ပွားကြောင်း သတင်းရရှိသဖြင့် လှည်းကူးမြို့နယ်မီးသတ်စခန်းမှ မီးသတ်တပ်ဖွဲ့ဝင်များသည် မီးသတ်ယာဉ် နှစ်စီးဖြင့် မီးငြှိမ်းသတ်ခဲ့ရာ နံနက် ၆ နာရီ ၁၀ မိနစ်တွင် မီးငြိမ်းခဲ့ပါသည်။
      အဆိုပါမီးလောင်မှုကြောင့် ယာဉ်အမှတ် BGO-11/5N-XXXX TOYOTA TOYOACE အမျိုးအစား ခဲရောင် ခြောက်ဘီး Box Truck ယာဉ် တစ်စီး၊ ယာဉ်ပေါ်ပါ လူသုံးကုန်ပစ္စည်းများနှင့် လျှပ်စစ်ပစ္စည်းများ မီးလောင်ဆုံးရှုံးခဲ့ကြောင်းနှင့် ယာဉ်မောင်း ဦးဝင်းကျော်မြင့်အား လှည်းကူးမြို့မရဲစခန်းမှ အမှုဖွင့်အရေးယူထားကြောင်း သတင်းရရှိပါသည်။