၂၀၂၅ ခုနှစ်၊ မတ် ၁၈ ရက်က နေပြည်တော်ကောင်စီနယ်မြေ၊ ဥတ္တရသီရိမြို့နယ်၊ ရန်ကုန်-မန္တလေးအမြန်လမ်းမကြီး၌ ဝိုင်ယာရှော့ခ်ဖြစ်ရာမှတစ်ဆင့် မော်တော်ယာဉ် တစ်စီး မီးလောင်မှုဖြစ်ပွားခဲ့ကြောင်း သိရသည်။
ဖြစ်စဉ်မှာ ၂၀၂၅ ခုနှစ်၊ မတ် ၁၈ ရက် ညနေ ၄ နာရီ ၃၀ မိနစ်တွင် နေပြည်တော်ကောင်စီနယ်မြေ၊ ဥတ္တရသီရိမြို့နယ်၊ ရန်ကုန်-မန္တလေးအမြန်လမ်းမကြီး မိုင်တိုင်အမှတ် ၂၂၈ မိုင် ၅ ဖာလုံ အနီး၌ မော်တော်ယာဉ် တစ်စီး မီးလောင်မှုဖြစ်ပွားကြောင်း သတင်းအရ ပန်းတင်အမြန်လမ်းမကြီးရဲစခန်းမှ တပ်ဖွဲ့ဝင်များ၊ အမြန်လမ်းမီးသတ်စခန်းမှ မီးသတ်တပ်ဖွဲ့ဝင်များပါဝင်သော ပူးပေါင်းအဖွဲ့က မီးသတ်ယာဉ် နှစ်စီးဖြင့် သွားရောက်ငြှိမ်းသတ်ခဲ့ရာ မိနစ် ၂၀ ခန့်အကြာတွင် မီးငြိမ်းသွားခဲ့ပြီး စိစစ်ရာ မန္တလေးမှ ရန်ကုန်သို့ ဥတ္တရသီရိမြို့နယ်၊ ကြီးပွားရေးရပ်ကွက်နေ အောင်ကျော်ဇော(၃၄)နှစ် မောင်းနှင်၍ ယာဉ်ပေါ်တွင် ပုလင်းခွံ၊ စက္ကူဂျပ်ဖာ၊ Battery အဟောင်းများတင်ဆောင်လာသည့် NPW-8/ 6F-XXXX HYUNDAI PORTER II ယာဉ်သည် အခင်းဖြစ်နေရာအရောက်၌ ယာဉ်နောက်ခန်းအတွင်း တပ်ဆင်ထားသော အလှမီးသီး၏ ဝိုင်ယာကြိုးရှော့ခ်ဖြစ်ရာမှတစ်ဆင့် မီးလောင်မှုဖြစ်ပွားခဲ့ပြီး မီးလောင်မှုကြောင့် ယာဉ်နောက်ခန်း အမိုးကိုင်းများနှင့် ယာဉ်ပေါ်ပါပစ္စည်းများ ပျက်စီးဆုံးရှုံးခဲ့သဖြင့် အောင်ကျော်ဇောအား ပန်းတင်အမြန်လမ်းမကြီးရဲစခန်း ယာဉ်(ပ)၈/၂၀၂၅၊ ရာဇသတ်ကြီး ပုဒ်မ ၂၈၅ ဖြင့် အမှုဖွင့်အရေးယူထားကြောင်း သတင်းရရှိသည်။
နေပြည်တော်ကောင်စီနယ်မြေ၊ ဥတ္တရသီရိမြို့နယ်၊ ရန်ကုန်-မန္တလေးအမြန်လမ်းမကြီး၌
မော်တော်ယာဉ် တစ်စီး မီးလောင်မှုဖြစ်ပွားမှု မှတ်တမ်းဓာတ်ပုံ။
