၂၀၂၅ ခုနှစ်၊ ဧပြီ ၃၀ ရက်က မန္တလေးတိုင်းဒေကြီး၊ ပြင်ဦးလွင်မြို့နယ်၌ ယာဉ်တိုက်မှုဖြစ်ပွား၍ အမျိုးသား တစ်ဦး သေဆုံးပြီး အမျိုးသား တစ်ဦးနှင့် အမျိုးသမီး သုံးဦးတို့ ဒဏ်ရာရရှိခဲ့ကြောင်း သိရသည်။
ဖြစ်စဉ်မှာ ဧပြီ ၃၀ ရက် ညနေ ၆ နာရီ ၃၀ မိနစ်တွင် မန္တလေးတိုင်းဒေသကြီး၊ ပြင်ဦးလွင်မြို့နယ်၊ ပြင်စာကျေးရွာ မန္တလေး-ပြင်ဦးလွင်အတက်ကားလမ်းမိုင်တိုင်အမှတ် ၁၆ မိုင် ၅ ဖာလုံအနီး၌ ယာဉ်တိုက်မှုဖြစ်ပွားကြောင်း သတင်းအရ ပြင်စာနယ်မြေရဲစခန်းမှ တပ်ဖွဲ့ဝင်များပါဝင်သော ပူးပေါင်းအဖွဲ့က သက်သေများနှင့်အတူ သွားရောက်စစ်ဆေးရာ မန္တလေးမှ ပြင်ဦးလွင်သို့ ပြင်ဦးလွင်မြို့နယ်၊ ရပ်ကွက်ကြီး(၁)နေ ထက်ဝေယံမင်း(၂၂)နှစ် မောင်းနှင်လာသည့် MDY-8/5D-XXXX SURF မော်တော်ယာဉ်သည် အခင်းဖြစ်နေရာအရောက်၌ လားရာတူ ၎င်းအရှေ့မှ အမရပူရမြို့နယ်၊ တောင်သမန်ကျေးရွာနေ ဖြိုးဖြိုးထွန်း(ခ)ကိုဖြိုး(၃၃)နှစ် မောင်းနှင်ပြီး ဇနီးဖြစ်သူ မအေမီကျော်(ခ)ယမင်းကျော်(၂၇)နှစ်၊ သမီးများဖြစ်သော မကျော့ကေခိုင်(၈)နှစ်နှင့် မနှင်းအေးသောင်း(၃)နှစ်တို့ လိုက်ပါလာသည့် MDY/46W-XXXX SCOOPYI 110 ဆိုင်ကယ်အား အရှိန်မထိန်းနိုင်ဘဲ ဝင်ရောက်တိုက်မိကာ တောင်ကမ်းပါးရံအား ထပ်မံတိုက်မိခဲ့သဖြင့် ဖြိုးဖြိုးထွန်း(ခ)ကိုဖြိုးတွင် ဒဏ်ရာများရရှိကာ အခင်းဖြစ်နေရာ၌ သေဆုံးသွားခဲ့ပြီး ထက်ဝေယံမင်းနှင့် မအေမီကျော်(ခ)ယမင်းကျော်၊ မကျော့ကေခိုင်၊ မနှင်းအေးသောင်းတို့ လေးဦးတို့တွင် ဒဏ်ရာများ အသီးသီးရရှိခဲ့သဖြင့် ထက်ဝေယံမင်းအား ပြင်စာနယ်မြေရဲစခန်း ယာဉ်(ပ)၇/၂၀၂၅၊ ရာဇသတ်ကြီးပုဒ်မ ၃၀၄-က/၃၃၈/၃၃၇ ဖြင့် အမှုဖွင့်အရေးယူထားကြောင်း သတင်းရရှိသည်။
မန္တလေးတိုင်းဒေသကြီး၊ ပြင်ဦးလွင်မြို့နယ်၌ ယာဉ်တိုက်မှုဖြစ်ပွား၍ အမျိုးသား တစ်ဦး သေဆုံးပြီး အမျိုးသား တစ်ဦးနှင့် အမျိုးသမီး သုံးဦးတို့ ဒဏ်ရာရရှိမှု မှတ်တမ်းဓာတ်ပုံ။
