မန္တလေးတိုင်းဒေသကြီး၊ ပုသိမ်ကြီးမြို့နယ်၌ အငြိမ်းစားပါမောက္ခ အမျိုးသမီး တစ်ဦးအား သတ်ဖြတ်မှုကျူးလွန်ခဲ့သူ တရားခံ အမျိုးသား တစ်ဦးအား ဖော်ထုတ်ဖမ်းဆီးရမိ

    ၂၀၂၅ ခုနှစ်၊ ဧပြီ ၂၇ ရက်က မန္တလေးတိုင်းဒေသကြီး၊ ပုသိမ်ကြီးမြို့နယ်၌ အငြိမ်းစားပါမောက္ခ အမျိုးသမီး တစ်ဦးအား သတ်ဖြတ်မှုကျူးလွန်ခဲ့သူ တရားခံ အမျိုးသား တစ်ဦးအား ဖော်ထုတ်ဖမ်းဆီးရမိခဲ့ကြောင်း သိရသည်။
    ဖြစ်စဉ်မှာ ဧပြီ ၂၇ ရက် နံနက် ၇ နာရီခန့်တွင် မန္တလေးတိုင်းဒေသကြီး၊ ပုသိမ်ကြီးမြို့နယ်၊ ရေထွက်ကျေးရွာရှိ လူနေထိုင်ခြင်းမရှိသည့် နေအိမ်အတွင်း အမျိုးသမီး တစ်ဦး သေဆုံးနေသည်ကို တွေ့ရှိရကြောင်း သတင်းအရ ပုသိမ်ကြီးမြို့မရဲစခန်းမှ တပ်ဖွဲ့ဝင်များက သွားရောက်စစ်ဆေးခဲ့ရာ ရေထွက်ကျေးရွာ၊ မြောင်းပေါင်ဘေး၊ လယ်ကွင်းအတွင်း ဆောက်လုပ်ထားပြီး လူနေထိုင်ခြင်းမရှိသည့် တစ်ထပ်တိုက်အတွင်း အငြိမ်းစားပါမောက္ခ ဒေါ်ထွေးထွေး(၆၆)နှစ်(ဘ)ဦးအောင်သန်းအား နဖူးပြတ်ရှဒဏ်ရာဖြင့် မှောက်လျက်အနေအထား သွေးအိုင်အတွင်း သေဆုံးပုပ်ပွနေသည်ကို တွေ့ရှိရသဖြင့် ပုသိမ်ကြီးမြို့မရဲစခန်း(ပ)၇၈/၂၀၂၅၊ ရာဇသတ်ကြီးပုဒ်မ ၃၀၂ ဖြင့် အမှုရေးဖွင့်၍ ပြစ်မှုကျူးလွန်သူများအား ဖမ်းဆီးရမိရေး ဆောင်ရွက်ခဲ့ပါသည်။
    အဆိုပါဖြစ်စဉ်မှ ပြစ်မှုကျူးလွန်သူများအား အမြန်ဆုံးဖော်ထုတ်ဖမ်းဆီးနိုင်ရေးအတွက် တာဝန်ရှိသူများက အထူးအမှုစစ်အဖွဲ့ ဖွဲ့စည်းကာ အခင်းဖြစ်ရပ်နှင့် ပတ်ဝန်းကျင်အား အသေးစိတ် စစ်ဆေးခြင်း၊ သေဆုံးသူနှင့်ပတ်သက်သည့် အချက်အလက်များအား စုံစမ်းရှာဖွေခြင်းများ အချိန်နှင့်တစ်ပြေးညီဆောင်ရွက်ခဲ့ရာ သေဆုံးသူ အငြိမ်းစားပါမောက္ခ ဒေါ်ထွေးထွေး အသုံးပြုမောင်းနှင်ခဲ့သည့် MDY-15/7G-XXXX BELTA အမျိုးအစား ခဲရောင်မော်တော်ယာဉ်အား အခင်းဖြစ်နေရာအနီးမှ သိမ်းဆည်းရရှိခဲ့ပြီး ဒေါ်ထွေးထွေးမှာ ပုသိမ်ကြီးမြို့နယ်၊ ရေထွက်ကျေးရွာရှိ မင်္ဂလာရန်ကင်းအိမ်ရာ (အငြိမ်းစားအိမ်ရာ)၊ တိုက်အမှတ်(C-16)၊ အခန်းအမှတ်(၄၀၁)တွင် တစ်ဦးတည်းနေထိုင်ပြီး တူတော်စပ်သူ ဦးရဲဝဏ္ဏနှင့်အတူ အိမ်ခြံမြေအရောင်းအဝယ်လုပ်ငန်းအား လုပ်ကိုင်ခဲ့ကြောင်း သိရှိရသဖြင့် ပတ်ဝန်းကျင်သက်သေများအား အသေးစိတ်စစ်ဆေးခဲ့ရာ သက်သေများ၏ ထွက်ဆိုချက်များအရ ဒေါ်ထွေးထွေးမှာ ဧပြီ ၂၅ ရက် နံနက် ၇ နာရီခန့်တွင် နေအိမ်မှ တစ်ဦးတည်း ၎င်းပိုင်မော်တော်ယာဉ်ဖြင့် ထွက်ခွာသွားသည်ကို မြင်တွေ့ရကြောင်း၊ ထိုနေ့ မွန်းလွဲ ၂ နာရီကျော်ခန့်တွင် စိုင်းထွန်းနော်(ခ)ကိုစိုင်း(ခ)ငြိမ်းချမ်းဖြိုး(ခ)ကိုဖြိုးမှ BELTA ခဲရောင်မော်တော်ယာဉ် တစ်စီးအား မောင်းပေးရန် ၎င်းနှင့်ခင်မင်ရင်းနှီးသူတစ်ဦးအား အကူအညီတောင်းခံခဲ့ကြောင်း၊ ၎င်းကားနောက်ခန်းအတွင်းမှ မိန်းမစီးဖိနပ်တစ်ရံအား ရေကန်အတွင်းသို့ လွှင့်ပစ်သည်ကို မြင်တွေ့ရကြောင်း၊ မွန်းလွဲ ၃ နာရီ ၁၅  မိနစ်ခန့်တွင်  ဒေါ်ထွေးထွေးနေအိမ်သို့ ၎င်းနှင့်မြေကွက် အရောင်းအဝယ်ပြုလုပ်နေသူ စိုင်းထွန်းနော်(ခ)ကိုစိုင်း(ခ)ငြိမ်းချမ်းဖြိုး(ခ)ကိုဖြိုး ရောက်ရှိလာပြီး နေအိမ်အတွင်း ဝင်သွားသည်ကို မြင်တွေ့ရကြောင်း စုံစမ်းဖော်ထုတ်သိရှိရသဖြင့် စိုင်းထွန်းနော်(ခ)ကိုစိုင်း(ခ)ငြိမ်းချမ်းဖြိုး(ခ)ကိုဖြိုးအား ဖမ်းဆီးစစ်ဆေးနိုင်ရေး ဆောင်ရွက်ခဲ့ရာ ၎င်းမှာ မိသားစုများနှင့်အတူ တောင်ကြီးမြို့သို့ ထွက်ခွာသွားကြောင်း ထပ်မံ စုံစမ်းသိရှိရသဖြင့် ရှမ်းပြည်နယ်ရဲတပ်ဖွဲ့နှင့် ပေါင်းစပ်ညှိနှိုင်း၍ ဖမ်းဆီးရမိနိုင်ရေး ဆောင်ရွက်ခဲ့ရာ မေ ၁ ရက် နံနက်ပိုင်းတွင် တရားခံ စိုင်းထွန်းနော်(ခ)ကိုစိုင်း(ခ)ငြိမ်းချမ်းဖြိုး(ခ)ကိုဖြိုး(၂၅)နှစ် (ဘ)ဦးစန်းယုအား ဟဲဟိုးမြို့ရှိ တည်းခိုးခန်းတစ်ခု၌ အငြိမ်းစားပါမောက္ခ ဒေါ်ထွေးထွေးအား သတ်ဖြတ်ပြီး ယူဆောင်ခဲ့သည့် မောင်းကွင်းရွှေလက်စွပ် ၁ ကွင်း၊ ကျောက်ပါ ရွှေထည်လက်စွပ် ၅ ကွင်း၊ ရွှေကလစ် ၁ ခု၊ ကျောက်ပါ ရွှေထည်လော့ကတ်သီး ၂ ခု၊ သံကြိုးပုံရွှေဆွဲကြိုး ၁ ကုံး၊ ကျောက်ပါ ရွှေဆွဲကြိုး ၁ ကုံး၊ ကျောက်ပါရွှေလက်ကောက် ၁ ကွင်း၊ ရွှေကြယ်သီး ၅ လုံး၊ မြေကွက်အရောင်းအဝယ် စာချုပ်/စာရွက်စာတမ်း ၃၉ စောင်၊ Wave 110 ဆိုင်ကယ် ၁ စီး၊ မြန်မာငွေစက္ကူရောရာ ၂,၀၂၀,၀၀၀ ကျပ်တို့နှင့်အတူ သိမ်းဆည်းဖမ်းဆီးရမိခဲ့ပါသည်။
    တရားခံ စိုင်းထွန်းနော်(ခ)ကိုစိုင်း(ခ)ငြိမ်းချမ်းဖြိုး(ခ)ကိုဖြိုး၏ ထွက်ဆိုချက်အရ ၎င်းနှင့် အငြိမ်းစားပါမောက္ခ ဒေါ်ထွေးထွေးတို့သည် ဧပြီ ၂၅ ရက် မွန်းလွဲ ၁၂ နာရီ ၃၀ မိနစ်ခန့်က ပုသိမ်ကြီး မြို့နယ်၊ ရေထွက်ကျေးရွာနှင့် နှမ်းကြဲကျေးရွာအကြားရှိ ဒေါ်ထွေးထွေး ပိုင်ဆိုင်သည့် ခြံကွက်အား အရောင်းအဝယ်ပြုလုပ်ရန်ပြသစဉ် အရောင်းအဝယ်မတည့်သဖြင့် စကားများရာမှ ဒေါ်ထွေးထွေးအား လည်ပင်းညှစ်၍ အုတ်နီခဲဖြင့် ဦးခေါင်းအား နှစ်ချက် ထုရိုက်ခဲ့ကာ ၎င်းစီးနင်းလာသည့် MDY-15/7G-XXXX BELTA အမျိုးအစား ခဲရောင်မော်တော်ယာဉ်အတွင်းမှ ရွှေထည်ပစ္စည်းများနှင့် ငွေကျပ်သိန်း ၅၀ တို့အား ယူဆောင်ကာ ထွက်ပြေးတိမ်းရှောင်ခဲ့ခြင်းဖြစ်ကြောင်း ဖော်ထုတ်သိရှိရသည်။
    ဖြစ်စဉ်တွင် အငြိမ်းစားပါမောက္ခ ဒေါ်ထွေးထွေးအား သတ်ဖြတ်၍ ၎င်းပိုင်ရွှေထည်ပစ္စည်းများနှင့် ငွေကြေးများအား ယူဆောင်ကာ ထွက်ပြေးတိမ်းရှောင်ခဲ့သူ စိုင်းထွန်းနော်(ခ)ကိုစိုင်း(ခ) ငြိမ်းချမ်းဖြိုး(ခ)ကိုဖြိုးအား သက်သေခံပစ္စည်းများနှင့်အတူ ဖော်ထုတ်ဖမ်းဆီးရမိခဲ့ပြီး ၎င်းအား ဥပဒေနှင့်အညီ ထိရောက်စွာအပြစ်ပေး အရေးယူနိုင်ရေး ဆက်လက်ဆောင်ရွက်လျက်ရှိကြောင်း သတင်းရရှိသည်။ 

မန္တလေးတိုင်းဒေသကြီး၊ ပုသိမ်ကြီးမြို့နယ်၌ အငြိမ်းစားပါမောက္ခ အမျိုးသမီး တစ်ဦးအား သတ်ဖြတ်မှုကျူးလွန်ခဲ့သူ တရားခံနှင့် ပြန်လည်သိမ်းဆည်းရမိသည့် သက်သေခံပစ္စည်းများ၏ မှတ်တမ်းဓာတ်ပုံ။