ရန်ကုန်တိုင်းဒေသကြီး၊ လှိုင်သာယာ(အနောက်ပိုင်း)မြို့နယ်၌ ၂၀၂၅ ခုနှစ်၊ ဇူလိုင် ၁၈ ရက်က မော်တော်ယာဉ်မှ အရှိန်မထိန်းနိုင်ဘဲ လမ်းဖြတ်ကူးသူ အမျိုးသား တစ်ဦးအား ဝင်ရောက်တိုက်မိ၍ သေဆုံးသွားခဲ့ကြောင်း သိရသည်။
ဖြစ်စဉ်မှာ ဇူလိုင် ၁၈ ရက် နံနက် ၅ နာရီ ၃၀ မိနစ်တွင် လှိုင်သာယာ(အနောက်ပိုင်း)မြို့နယ်၊ အမှတ်(၅)လမ်းပေါ်၌ ယာဉ်တိုက်မှုဖြစ်ပွားကြောင်း သတင်းအရ အမှတ်(၉)ယာဉ်ထိန်းရဲဒုတပ်ဖွဲ့ခွဲမှ တပ်ဖွဲ့ဝင်များက သွားရောက်စစ်ဆေးခဲ့ရာ ထန်းတပင်မြို့နယ်၊ လမုကျေးရွာနေ ခင်မောင်အေး(၆၀)နှစ် မောင်းနှင်လာသည့် MDY-12 7R/XXXX CHEVROLET TRAX မော်တော်ယာဉ်သည် အမှတ်(၅)လမ်းအတိုင်း အရှေ့ဘက်မှ အနောက်ဘက်သို့ မောင်းနှင်လာစဉ် မြရတနာလမ်းအလွန်အရောက်၌ လမ်းဖြတ်ကူးသူ မော်လမြိုင်ကျွန်းမြို့နယ်၊ ကျောင်းစုကျေးရွာနေ ဦးစိုးမြင့်(၆၁)နှစ်အား အရှိန်မထိန်းနိုင်ဘဲ ဝင်ရောက်တိုက်မိခဲ့သဖြင့် ဦးစိုးမြင့်တွင် ဒဏ်ရာများရရှိကာ သေဆုံးသွားခဲ့သောကြောင့် ခင်မောင်အေးအား လှိုင်သာယာ(အရှေ့ပိုင်း)မြို့မရဲစခန်း ယာဉ်(ပ)၁၀/၂၀၂၅၊ ရာဇသတ်ကြီးပုဒ်မ ၃၀၄-က/၂၇၉ ဖြင့် အမှုဖွင့် အရေးယူထားကြောင်း သတင်းရရှိပါသည်။
ရန်ကုန်တိုင်းဒေသကြီး၊ လှိုင်သာယာ(အနောက်ပိုင်း)မြို့နယ်၌ မော်တော်ယာဉ်မှ အရှိန်မထိန်းနိုင်ဘဲ လမ်းဖြတ်ကူးသူ အမျိုးသား တစ်ဦးအား ဝင်ရောက်တိုက်မိမှု မှတ်တမ်းဓာတ်ပုံ။
